عليك اتهددن بس حلفتهن بيك
ببيات القوافي بحرگة گاملك
لو مابينكم طبيت محظر خير
لا ثق چا شفتهن هنَ وصللك
عند اترف شطر طلعت مخالب بيه
من شفتك أگبالي انياب طلعلك
مو عن قافية تكضني انا ما اسميك
وصفت الملامح بألأسم شلك ؟
انا القافية من أطيعني عمياء
بس اوصف مكانك هي تندلك
اهده مطشرة بس تنقرا عصماء
گلولك عليها الگلك شگلك
حروف أچفوف بيها لاتصير خيوط
لعبة اتصير بيها تشدك تحلك
انت بنص حرف من شطر بيت اضيع
شني من نص حرف يستهدفك كلك
صل قلمك نعم بس تدري قلمي شبيه؟
بيه طائر خرافي ويلتهم صلك!
لاتتوهم اضل وحدة ماموجود
من ينوجد شخصك ينوجد ظلك
صدگت اليگلك طرت من رفيت
تعقلها انت تمشي وطاير يگلك
لااضن بيه ملاك الشفت عنده جناح
اذا ماشفته طار اتوقعه يزلك
اذا ماتوگف الطاري القصيدة اجلال
لاتعتب عليها وتطلب آجْلك
أكو عندك خلل لازم اذا حسيت
تهواك الشماته ويبتعد خلك
النقصن بالوزن عادي البشر خطاء
مابيهن اشكال وفدوة يرحلك
بس احذر اذا نقصك بروحك صار
تختل الصور والقافية تملك
دمعة بالجفن وي روحك تواسيك
بس گبال شامت تگدر تذلك
القصيده
للشاعر المبدع
ايهاب المالكي
