ما الومك..
انت ماتسوى الملامة
انت صفحة انشلعت بنص الكتاب
ما الومك..
يل اجيت زحوف تمشي
وبست ايدي لجل افتحلك الباب
ومن فتحته !!
آه .. كَلي شصار بية من فتحته
تحولت دنياي بالظلمة سراب
ما الومك..
يل نذرت نذور حتى تشوفني
وحلفت بالباري لا متعوفني
وبليالي الشتا الفاتت
العتب زاد وكتلني
وجنت احسب يمته يخلص هالعتاب
وك شتاي بليلة صار الجمر حدّه
وك دسِد باب العتب يمته تسدّه
وك دخيلك خلص صبري
والامل مفَكود وماحسبت فكده
ما الومك..
يل عفتني بجرح ما ظن يلتئم
و يل اشوفك لغيري تكدر تبتسم
ما الومك..
بس الوم الروح لمن حبّتك
عافت الدنيا وابد ما عافتك
غمَضِت من يوم عيني شافتك
حتى ماشوفن ابد واحد بعد
وعد هذا تكتبه يمك اي وعد
ومن عيون الناس كاتلني الحسد
ظنهم ابيض كلبك ومابي حقد
ما الومك روح لا ترجع بعد
وانت طالع سدّه باب الكلب روح
وعوفني وعوف الجروح
وخلني وحدي أرد انوح
ولا تعود لخاطر الله لاتعود
خلص حيلي ما اريد ارجع ردود
ما اريدك ورجّعت كل الحدود
و هذا دمعي عالخدود
تعال شوفه
ماتعب ثق من صيامه
بس تعب تعرف لويش؟
من اجه سهمك جرحني
وحفر بخدودي علامة
وارجع واحجي واكول
ما الومك..
انت ماتسوى الملامة
